Mizote hi inpumkhat leh intuam hlawm hnam kan nih avangin chhiat ni \hat niah tu an nih thlu lovin kan inpun khawm \hin. Tui tla an awm ni khua pawhin tui thiam lote pawh hâi lovin a hmei a pa kan chhuak khawm \hin a nih hi. Dan naranin fur tui tam laiin tui lama che sual a awm tlangpui a. Khawtlangin tlawmngaiin ni sarih chhung kan zawng \hin. Hetiang ni khuaah hian tui thiam lote tan chuan lui kam kawng \um a zawh reng theih \hin loh va. Tui thiam lo na na na chu tui tla ruang zawng e ti lovin tlang sâng tak taka lawn ur ur a ngai fo va; mahse kan zâwna chu lui mawngah a pil reng si! Mipui tam zâwk chu heng zîngah hian an tel \hin. Heng mite hi ruang zawngtu tih loh theih phei chu an ni bîk lo; zawng ve miau hek le. Mahse eng tik khaw tikah mah an zawng hmu ngai hauh lo vang, tui chhunga zawng tute an \awiawmna ropui tak hmuh kân vang ni lovin.

Mizote hi kan vanneiha siamin Kristian kan ni huk mai a. Kristian nih loh zahthlak khawpin nun phungah kan neih hial tawh a ni. Kristian rinna leh nun dan \ha ngaihsan vang emaw, Hindu, Muslim leh sakhaw dang inzirtirna aia a \ha kan tih zawk vang zui kan nihna aiin ram pum huapa sakhaw lian leh zui loh ngam loh a nih avanga zui mai an awm nual lo vang tih sawi har tak a ni. Mizo nih leh Hindu nih chu thil ni theiah kan ngai meuh rih lo chu a nih hi. Bible vawi khat te pawh la chhiar chhuah uk si lova inla Kristian em em an awm mial mai thei a. Nunphung pangngai ve renga neih avang leh kan velah sakhaw dang lian filawr deuh dang a awm loh avanga Kristian ve mai mai a awm nual theih ang.

A eng pawh chu lo ni teh reng se a lian a tein Krismas kan ur lawk \heuh va. Kan theih ang angin kawng tin rengah kan inpuahchah \heuh chu a ni. Sumdawngin a tam thei ang ber hralh hunah an ngai a; \henkhat lahin nuam thei ang bera chen tumin zu an bilh sauh sauh bawk a. Kohhran lamah pawh zai tui theih dan thar hmuh chhuah tumin thlarau mite an phe mar mar mai. Naupang pawhin nu leh pate pawk ber hunlai a nih an hai lo va; chuvangin an hmuh phak china a \ha leh mawi ber neih tumin rualawh an lo zir ve ngar ngar bawk a.

Nulaten mal ngawih ngawih an hlau va; mahse sihhnip nih an hreh \heuh thung. Tlangvalho lahin ar kanpui tur an hual lawk a, fianrial \halai an hauh ru lawk \hem bawk a. Mi tinin a bîk thei ang bera hman kan tum a. Lusun chhungte pawhin hnemtu an ngaih rualin hnem an duh lo emaw tih mai turin a zualkai thei ang bera sun dan an suangtuah \hin.

Heng zawng zawng hi dem tur an awm lo; kan intihhmuh zo vek tawh a ni. Nunah a bet zo tawh a, nunphung pangngai a ni thaw thang tawh. Heng hian Krismas hi a ti-Krismas riaute pawhin a ngaih theih hial ang chu.

Krismas ur lâwktu tam tak hi chuan kan nghah ber leh kan lawm bera hi kan hmuak chhuak dawn leh pekin a lang lo. Tui tla ruang, tlang sânga zawngtute ang mai hian NAU PIANG chibai bûk tum lo let der bîk si lo hian a pian lohna hmunah kan zawng leh suau suau vang a. Hlawhtling leh hlawhchham kan thelh leh sung sung dawn a ni.

Khaw chhak mi fingte khan rem hre tak, nuam sa tak bawkin, sang tak thlirin, mahse mahni finna innghat chungin Arsi ropui neitu an zawng a, an tumnaah an zawng hmu zo der lo. Berampute erawh chuan chhinchhiahna mawl mang te behchhanin van sang lam melh hu hu lovin, vantirhkoh thusawi, mahni remhriatna hmanga her rem hek lovin, a sawi ang takin an pan ding nalh a, an va hmu ta mai a nih kha!

Eng level pawh ni ila, kan changkang emaw, kan inla changkang emaw, kan fing emaw, kan hausa emaw, kan mawlmang emaw, kan rethei emaw pawh ni se; tui tla ruang zawngtu inang lo tak takten mi ruang thuhmun reng an zawng ang mai leh, Mi Fingte leh Beramputen nausen thuhmun an zawng ang mai khan, tum thuhmun \heuh si hian kawng hrang \heuh kan zawh leh suau suau ang a, mahse hmuh kan tuma chu a thuhmun reng si ang. A zawnna hmun dika zawng lotute chu an hlawhchham loh vek pawhin, khawchhak mi fingte ang mai khan an pal baw nuai ang a, Pathian aw ngaichangtute chuan chau hnep lo pawhin an zawng hmu thung si ang.

Kan dinhmun ang zia zelin Pathianin min ko \heuh va. Hriatthiam har leh zir chian tham fe, arsi mak tak hmanga khawchhak mi fingte Pathianin a hruai ang tho khan mi thiam leh hausate pawh an nihna ang zelin Pathianin a ko che u a. Mi fing leh tawng sangte pawh Pathian hmêlma an ni ngawt lo. Chutiang zelin mi chuan hnuai zâwkte pawh kan phak ang tawk zelin, Berampute ang mai khan, koh kan ni.

Kan rama Krismas hmuaktu inti tam takte hian Krismas an hmuak lo va, kum tawp sûn leh kum thar lawmin an hmanhlel a ni zâwk. Tum thuhmun emaw kan tih hi tum thuhmun anga lan tumte mai an ni fur a. An tum tak chu Heroda thil tum ang mai khan a dang daih a ni. Mahni finna leh remchanna hmanga zawngtuten an bo der ang a, Pathian aw ngaichang mi chuan awlsam tein Lal Piang chu a tawng ngei ang.

Pathian kan tawhna daltu hi kan NEIH leh NEIH loh thil a ni ber lo va; kan neih kan hman dan leh kan neih loh kan hmachhawn dan hian Pathian hmu thei turin kan mit a siamrem theiin, Pathian hmu thei lo turin kan mit a timim thei zâwk a ni.